Дортмунднинг «Боруссия» клуби ижара асосида жамоада ўйнаётган «Челси» ҳимоячиси Аарон Ансельминони ўз сафида қолдириши мумкин. Бу ҳақда журналист Экрем Конур хабар бермоқда.
Манбанинг маълум қилишича, 20 ёшли аргентиналик футболчининг дебюти «асаларилар» раҳбариятини жуда таъсирлантирган ва клуб унинг трансферини тўлиқ амалга ошириш имкониятини кўриб чиқмоқда.
Эслатиб ўтамиз, «Челси» Ансельминони «Бока Хуниорс» клубидан 16,5 миллион евро эвазига сотиб олган эди. Ҳимоячининг лондонликлар билан амалдаги шартномаси 2031 йилгача мўлжалланган. Transfermarkt маълумотларига кўра, унинг бозор қиймати 8 миллион еврони ташкил қилади.
