Қозонда давом этаётган бутунжаҳон Универсиада мусобақалари ўзбек боксчилари учун омадли келмоқда. Ҳозирча икки нафар спортчимиз финал йўлланмасини қўлга киритди.
Аввалига 49 кг. вазн тоифасида рингга чиқаётган Ҳасанбой Дўстматов ярим финалда мўғулистонлик Ган-Эрдене Ганхуянгга қарши рингга чиқиб рақибига уччала раундда ҳам имконият қолдирмади. Энди финалда жанубий кореялик Ин Кю Кимга қарши рингга кўтарилади. Ким ярим финалда қозоғистонлик Ержан Жўмартни уччала раундда ҳам мағлубиятга учратганди.
52 кг. вазнда эса ярим финалда йўқотишга учрадик. Жасурбек Латипов финал остонасида Энхделгер Харкхууга қарши бокс жангида имкониятни бой берди. Қизиқ томони ғолиб номи сўнгги ҳакамнинг сўнгги қарорига кўра аниқланди. Унга қадар кучлар мутлақо тенг баҳоланиб келинганди. Мағлубиятга қарамай Латипов Ўзбекистон терма жамоасига навбатдаги бронза медалини клетирди.
Олимпиада ўйинлари кашфиётларидан бири Фазлиддин Ғойибназаров эса 60 кг. вазнда финалга чиқди. Ўзига хос Ўзбекистон-Мўғулистон тўқнашувида бу сафар ғалаба навбати ўзбекистонлик спортчига келди. Ғойибназаров уччала раундда ҳам Отгондалай Дорйнямбуга имконият қолдирмади. Ғойибназаров финалда россиялик Адлан Абдурашидовга қарши рингга кўтарилади. Адлан ярим финалда кореялик Санг Минг Лидан устун келган.
Бугун шунингдек яна бешта вазн тоифасида боксчиларимиз финал йўлланмаси учун кураш олиб боришади. Сайтимиз орқали бу борада ҳам ахборот бериб борамиз.