Маълумки, "Андижон" 17 сентябрь куни Осиё Чемпионлар лигаси 2 мусобақасининг "B" гуруҳи доирасидаги 1-тур ўйинини Туркманистонда "Аркадаг" клубига қарши ўтказади.
Шу муносабат билан тарихий учрашув бўсағасида турган жамоанинг қароргоҳида йиғилиш бўлиб ўтди. Унда футболчилар ва мураббийлар штабидан ташқари Андижон вилояти футбол ассоциациясининг биринчи вице-президенти Бекзод Каримов, Андижон вилояти спорт бошқармаси бошлиғи Ўткир Тошпўлатов, фан-клуб раиси Нодирбек Тўйчиев ва албатта клуб раҳбарияти иштирок этди.
"Андижон" клуби ОЧЛ 2 да нафақат вилоят, балки юртимиз шарафини ҳам ҳимоя қилади. Футболчилар олдида катта масъулиятли вазифа турибди. Йиғилишда ушбу жабҳага ҳам алоҳида тўхталиб ўтилди ва жамоа аъзоларининг кайфияти билан қизиқишди, қандай муаммо бўлса тўлиқ бартараф этилиши маълум қилинди ҳамда омад тилади. Жамоада барчаси жойида ва юқори кайфиятда тайёргарлик давом этмоқда.
Андижон вилояти ҳокими ҳам жамоанинг ОЧЛ 2 да муносиб қатнашиши учун тўлиқ қўллаб-қувватлаб, барча зарур чораларни, ёрдамларни кўрсатган ҳолда "Андижон"нинг халқаро майдонда мардонавор ва муваффақиятли қатнашишини айтиб омад тилагани хусусида Бекзод Каримов алоҳида таъкидлаб ўтди.
Андижон халқи футболчилардан ижобий натижалар кутаётгани аниқ. Йиғилиш очиқ ва самимий руҳда ўтди, ўз навбатида футболчилар ҳам барча шароитлар яратиб берилаётганини айтиб, раҳбариятга миннатдорчилик изҳор қилди ва ҳамма астойдил меҳнат қилиб, ОЧЛ 2 мусобақасини ғалаба билан бошлаш учун охиригача курашишларини қўшимча қилдилар.
"Андижон" эртага Андижон аэропортидан Чартер рейс орқали Туркманистонга жўнаб кетади.
Эслатиб ўтамиз, "Аркадаг" - "Андижон" беллашуви 17 сентбярь куни соат Тошкент вақти билан 18:45 да бошланади.
