Ma’lumki, "Andijon" 17 sentyabr kuni Osiyo Chempionlar ligasi 2 musobaqasining "B" guruhi doirasidagi 1-tur o‘yinini Turkmanistonda "Arkadag" klubiga qarshi o‘tkazadi.
Shu munosabat bilan tarixiy uchrashuv bo‘sag‘asida turgan jamoaning qarorgohida yig‘ilish bo‘lib o‘tdi. Unda futbolchilar va murabbiylar shtabidan tashqari Andijon viloyati futbol assosiasiyasining birinchi vise-prezidenti Bekzod Karimov, Andijon viloyati sport boshqarmasi boshlig‘i O‘tkir Toshpo‘latov, fan-klub raisi Nodirbek To‘ychiyev va albatta klub rahbariyati ishtirok etdi.
"Andijon" klubi OCHL 2 da nafaqat viloyat, balki yurtimiz sharafini ham himoya qiladi. Futbolchilar oldida katta mas’uliyatli vazifa turibdi. Yig‘ilishda ushbu jabhaga ham alohida to‘xtalib o‘tildi va jamoa a’zolarining kayfiyati bilan qiziqishdi, qanday muammo bo‘lsa to‘liq bartaraf etilishi ma’lum qilindi hamda omad tiladi. Jamoada barchasi joyida va yuqori kayfiyatda tayyorgarlik davom etmoqda.
Andijon viloyati hokimi ham jamoaning OCHL 2 da munosib qatnashishi uchun to‘liq qo‘llab-quvvatlab, barcha zarur choralarni, yordamlarni ko‘rsatgan holda "Andijon"ning xalqaro maydonda mardonavor va muvaffaqiyatli qatnashishini aytib omad tilagani xususida Bekzod Karimov alohida ta’kidlab o‘tdi.
Andijon xalqi futbolchilardan ijobiy natijalar kutayotgani aniq. Yig‘ilish ochiq va samimiy ruhda o‘tdi, o‘z navbatida futbolchilar ham barcha sharoitlar yaratib berilayotganini aytib, rahbariyatga minnatdorchilik izhor qildi va hamma astoydil mehnat qilib, OCHL 2 musobaqasini g‘alaba bilan boshlash uchun oxirigacha kurashishlarini qo‘shimcha qildilar.
"Andijon" ertaga Andijon aeroportidan Charter reys orqali Turkmanistonga jo‘nab ketadi.
Eslatib o‘tamiz, "Arkadag" - "Andijon" bellashuvi 17 sentbyar kuni soat Toshkent vaqti bilan 18:45 da boshlanadi.
