"Манчестер Юнайтед" янги мавсумни ёмон бошлади ва 4 турда атиги 4 очко жамғарди. Якшанба куни Рубен Аморим жамоаси дербида "Манчестер Сити"га 0:3 ҳисобида имкониятни бой берди. Айни дамда "қизил иблислар" Премьер-лига турнир жадвалида 14-ўринни эгаллаб турибди.

Daily Mail хабарига кўра, "Манчестер Юнайтед" футболчилари Рубен Аморим тизимига ишонмай қўйишган. Аморимни қўллаб-қувватлаётган жамоа сардори Бруну Фернандеш ҳам майдонда ўзини ноқулай ҳис қилмоқда. Фернандешга майдонда ҳимояга яқин жойлашишга тўғри келаётгани ёқмаяпти.

Аморим 3-4-2-1 ўйин тизимидан фойдаланади. "Манчестер Юнайтед" тўлақонли ёзги мавсумолди ўйинлари вазиятни яхшилашга ёрдам беришига умид қилганди, аммо ҳозирча олдинга силжиш йўқ. Дербидаги мағлубиятдан сўнг Аморим футбол фалсафасини ўзгартиришдан кўра, уни ишдан бўшатишларини айтди. Муросага келишдан бош тортиш мураббийнинг кийиниш хонасидаги вазиятни бутунлай қўлдан чиқаришига олиб келиши мумкин.