"Арсенал" бош мураббийи Микель Артета Чемпионлар Лигасида "Атлетик"ка қарши кечган ўйин ҳақида фикр билдирди. Биринчи тур доирасидаги учрашув меҳмонда "канонирлар"нинг 2:0 ҳисобидаги ғалабаси билан якунланди.

Мутахассис Бильбаодаги стадиондаги муҳит унга жуда ёққанини тан олди. Унинг фикрича, бу футбол ўйнаш учун ажойиб жой.

"Ўйин жуда оғир кечди. Дастлабки 20-25 дақиқа бизга қийин бўлишини билардик. Лекин ўйин давомида қўшиб бордик, деб ўйлайман. Иккинчи бўлимда анча фаолроқ бўлдик ва кўпроқ хавф туғдирдик. Ва охир-оқибат биз ўйинда ғалаба қозондик. Умуман олганда, мен жуда мамнунман," - деди Артета журналистларга.