"Аталанта" мухлислари ҳужумчи Адемола Лукман асосий таркибга қайтганидан кейин унга ўз муносабатини билдирди. Бу қарорни жамоа бош мураббийи Иван Юрич футболчи билан суҳбатлардан сўнг қабул қилди, деб хабар беради Football Italia.
Бергамода "11-рақам қайта тикланди, лекин биз учун сиз ношукур бўлиб қоласиз" деб ёзилган баннер пайдо бўлди.
Лукман ўтган мавсум охиридан бери "Аталанта" жамоасидан алоҳида шуғулланиб келаётган эди. Футболчи ёзги трансферлар вақтида жамоани тарк этмоқчи бўлганди, аммо "Интер"нинг 45 миллион евролик таклифи рад этилган. Кейинроқ нигериялик футболчи воқеа юзасидан қатор хабарлар эълон қилиб, клубни танқид остига олди.
Лукман А Серия мавсуми бошланишига атиги 5 кун қолганида Бергамога қайтди ва бу унинг таркибдан четлатилишига олиб келди. 3 турдан сўнг унинг жамоаси А Серияда саккизинчи ўринда бормоқда.
