"Манчестер Сити" марказий ҳимоячиси Рубен Диаш Премьер-лига доирасидаги Лондоннинг "Арсенал" клубига (1:1) қарши ўйиндаги дуранг ҳақида қандай фикрда эканини айтди.
"Шаҳарликлар" ўйин бошида Эрлинг Холаннинг ҳаракатлари билан олдинга ўтиб олганди, аммо қўшиб берилган дақиқаларда гол ўтказиб юбориб, ғалабани қўлдан чиқарди.
"Биз сафарда муҳим очкони қўлга киритдик, аммо охирида гол ўтказиб юбориш жуда аламли - ғалаба жуда яқин эди. Тўпга эгалик қилиш борасида биз учун ноодатий ўйин бўлди, лекин барибир ўзимизни кўрсатдик, бирдамликда ҳаракат қилдик, ғалаба учун ўйнадик. Чидаш керак бўлган пайтларда биз буни муносиб қабул қилдик."
"Ҳа, "Арсенал" тўпга кўп эгалик қилди, аммо биз вазиятни тўлиқ назорат қилаётгандек ҳис қилдим. Рақиб ҳақиқий хавф туғдирмаётгандек туюлди, аммо якунда гол ўтказиб юбордик. Умид қиламанки, бундан хулоса чиқарамиз," - деди Диаш ўйиндан кейинги интервьюсида.
