Лондоннинг "Арсенал" клуби бош мураббийи Микель Артета жамоасининг Премьер-лига турнир жадвалида "Ливерпуль"дан ортда қолаётгани ҳақида гапирди.
Якшанба куни "канонирлар" ўз уйида "Манчестер Сити" билан дуранг ўйнади (1:1). Бир кун аввал "Ливерпуль" дербида "Эвертон"ни мағлуб этиб (2:1), ғалабали сериясини узайтирганди. Арне Слот жамоаси 5 турдан сўнг 15 очко тўплаган ҳолда ҳамон пешқадам. "Арсенал" жадвалда иккинчи, аммо етакчидан 5 очко ортда қолмоқда.
"Ливерпуль" ҳар ўйинда ғалаба қозонмоқда, биз буни назорат қила олмаймиз. Жуда қийин бўлади, аммо "Манчестер Сити"га қарши ўйиндаги каби ўйин кўрсатишда давом этсак, унда ҳаммаси яхши бўлади," - деди Артета ўйиндан кейинги ОАВ билан суҳбатда.
"Ливерпуль" кейинги турда "Кристал Пэлас" меҳмони бўлса, "Арсенал" "Ньюкасл" майдонига сафар қилади.
