Ўзбекистонлик UFC жангчиси Рамазон Темиров допинг қоидаларини бузганликда айбланиб, 6 ойга дисквалификация қилинганини эълон қилди. Бу ҳақда спортчи ўзининг Instagram саҳифасида маълум қилди.

“Охирги допинг назорати таҳлиллари чиқди, ҳаммаси тоза. Менга фақатгина 6 ойлик дисквалификация берилди. Бу жазога сабаб — қонун-қоидалардаги айрим бузилишлар. Худо хоҳласа, март ойида октагонга қайтаман. Яхшиямки, икки ёки тўрт йилга тақиқ қўйилмади, фақат олти ой. Бу вақт ичида ким дўст, ким сохта — барчаси аён бўлди. Аввал ёнимда 10–15 киши бўларди, ҳозир эса фақат ҳақиқий яқинларим. Алҳамдулиллаҳ, сабр билан кутяпмиз. Март ойидан яна бошидан бошлаймиз”, дея ёзди Темиров.

Эслатиб ўтамиз, жорий йилнинг июль ойида Рамазон Темиров Қозоғистонлик аралаш жанг санъати устаси Асу Алмабаевга қарши октагонга чиқиши керак эди. Бироқ жанг олдидан ўзбекистонлик спортчининг допинг намуналарида тақиқланган модда аниқлангани сабабли баҳс бекор қилинган эди.

Спортчи Таиландда ўтказган машғулотлар чоғида инфекцион яра билан боғлиқ муаммога дуч келган. Даволаниш жараёнида шифокор тавсия қилган дори воситасининг таркибида тақиқланган модда бўлгани маълум бўлган.