Дин Хёйсеннинг отаси Донни Хёйсен футболчининг 2024 йил ёзида "Ювентус"ни тарк этиши тафсилотлари билан ўртоқлашди.
Истиқболли марказий ҳимоячи ўша ёзда "Бьянконерилар"ни қабул қилиб олган Тьяго Моттага керак бўлмади. Испаниялик футболчи "Борнмут"га 20 млн евродан камига қўйиб юборилди. Орадан бир йил ўтиб, "олчалар" футболчини Мадриднинг "Реал" клубига 62,5 млн еврога сотиб юборди.
"Бу ҳақиқий шок эди, биз бунга ишона олмадик. Дин "Ювентус"да ўзини яхши кўрсатди, аммо Мотта қўпол тарзда лойиҳага мос келмаслигини ва кетиши кераклигини айтди", - деди Донни Хёйсен Tuttosport нашрига берган интервьюсида.
Эслатиб ўтамиз, Тьяго Мотта Турин клубидаги дебют мавсумининг охиригача ҳам ишлай олмади - март ойида у истеъфога чиқарилди.
