Таниқли қозоғистонлик мутахассис Талғат Байсуфинов Қозоғистон миллий терма жамоаси бош мураббийи вазифасини вақтинча бажарувчи сифатида тасдиқланди.
Талғат Маруанович ЖЧ-2026 саралаш босқичи доирасидаги Лихтенштейнга (10 октябрь) ва Шимолий Македонияга (13 октябрь) қарши ўйинларда жамоага раҳбарлик қилади.
Байсуфинов аввал ҳам икки бор миллий терма жамоани бошқарган — 2016–2017 ҳамда 2020–2022 йилларда. Ҳозирда эса у Қозоғистон U-21 терма жамоаси мураббийларига маслаҳатчи (ментор) сифатида фаолият олиб бормоқда.
ҚФФ Талғат Маруановичнинг профессионаллигига ишонч билдириб, миллий жамоанинг яқиндаги ўйинларида омад тилади.
Шу билан бирга, ҚФФ терма жамоага янги бош мураббий тайинлаш бўйича фаол музокараларни давом эттирмоқда. Айни пайтда якуний босқичга чиққан рўйхатда уч номзод бор ва уларнинг барчаси легионер мутахассислардан иборат.













