Беларусь ёшлар терма жамоаси (U-16) устози Дмитрий Чалей III МДҲ ўйинларида Ўзбекистон U-16 жамоасига қарши ўйин (2:1) борасида ўз фикрини билдирди.

— Биз рақиб билан танишмиз — бу жуда бақувват ва яхши шаклланган жамоа, унда ёрқин футболчилар бор. Шунинг учун учрашув осон кечмаслигини кутгандик. Қолаверса, биз уч кунда иккинчи ўйинни ўтказдик, улар эса бизга қарши дебют қилишди. Умуман олганда, биринчи тайм биз учун яхши ўтди: машғулотларда тайёрлаган нарсаларни ўйинда амалга ошира олдик, икки гол урдик ва учинчи голни ҳам киритиш имкониятига эга бўлдик.

Иккинчи таймда кучимиз тугай бошлади, прессингда шундай юқори суръатни сақлаб қолиш қийин бўлди. Ўзбеклар эса аксинча иккинчи нафасни топишди — бу уларнинг илк учрашуви бўлгани учун анча тетик кўринди ва ҳисобни тенглаштиришни исташди. Улар ўйинда ўзгариш қилди ва янада тажовузкор ҳаракат қила бошлади. Биз уларни тўхтатишга уриндик. Ўйлайманки, ҳимояда ёмон ишламадик. Асосан, дарвозамиз олдида хавфли вазиятлар юзага келмади, аммо босим жуда катта бўлди. Сўнгги 10-15 дақиқа умуман пастки блокда “ўтиришга” тўғри келди. Фақатгина қўшимча вақтда ўзбеклар бир голни уришга муваффақ бўлишди: тўғридан-тўғри жарима зарбасидан.

Ғалабага қарамай, ўйиндан кейин ёқимсиз таассурот қолди. Ундан ташқари, шу гол ҳам салбий ҳиссиётлар қўшди. Албатта, мусобақа регламентидан кўп жиҳатлар келиб чиқади. Масалан, қуръа натижаларига кўра энди бизга кўп нарса боғлиқ эмас: камида 3-ўрин учун курашамиз. Гуруҳимиздаги Россия — Ўзбекистон учрашуви натижаларини, бошқа квартетда эса Озарбайжон — Қирғизистон ўйини натижасини кутяпмиз. Шу ўйинларнинг якунлари биз биринчи ёки учинчи ўрин учну курашишимизни ва қайси жамоа рақиб бўлишини белгилаб беради.

Ҳозир жамоа режасида тикланиш турибди. Кейинги ўйинга тайёргарлик кўрамиз. Ва, албатта, йигитларни шу ғалаба билан табриклайман!