«Барселона» спорт директори Деку «Атлетик» вингери Нико Уильямснинг каталонияликлар сафига ўтиши ҳақидаги миш-мишларга ойдинлик киритди.

— Биз ҳеч қачон Нико Уильямс ортидан қувмаганмиз. Аслида унинг агенти бир неча марта биз билан боғланган, аксинча эмас. «Атлетик» унинг вакилидан бу гаплар нега тарқалганини сўраши керак. Ўйинчи, очиғини айтганда, биз қидираётган профилга ҳам тўлиқ мос келмасди, — деди Деку.

Трансфер сиёсатида аниқ қоидалар
Функционер «Барселона»да трансфер сиёсати қатъий қоидаларга асосланишини, агентлар ёки футболчиларнинг босимига йўл қўйилмаслигини таъкидлади:

— Биз шартларни ва параметрларни ўзимиз белгилаймиз. Шундан кейин музокаралар қоғозга тушиши керак. Биз аниқ айтдик: клубга ҳеч қандай футболчи ўз қоидаларини ўтказа олмайди.

Уильямс ва Ямал – дўстлар
Уильямснинг «Барселона»га ўтиши ҳақидаги овозаларга унинг жамоанинг ёш юлдузи Ламин Ямал билан яқин дўстлиги ҳам сабаб бўлган.

Икки вингер ҳам Евро-2024да Испания терма жамоаси сафида яхши ўйин кўрсатган: Уильямс икки гол урган ва бир голли узатма қилган.

Ҳозирда Нико Уильямс жароҳатдан тикланмоқда. Жорий мавсумда у Ла Лигада учта ўйин ўтказиб, бир гол ва бир голли узатма қайд этди.