«Barselona» sport direktori Deku «Atletik» vingeri Niko Uilyamsning kataloniyaliklar safiga o‘tishi haqidagi mish-mishlarga oydinlik kiritdi.

— Biz hech qachon Niko Uilyams ortidan quvmaganmiz. Aslida uning agenti bir necha marta biz bilan bog‘langan, aksincha emas. «Atletik» uning vakilidan bu gaplar nega tarqalganini so‘rashi kerak. O‘yinchi, ochig‘ini aytganda, biz qidirayotgan profilga ham to‘liq mos kelmasdi, — dedi Deku.

Transfer siyosatida aniq qoidalar
Funksioner «Barselona»da transfer siyosati qat’iy qoidalarga asoslanishini, agentlar yoki futbolchilarning bosimiga yo‘l qo‘yilmasligini ta’kidladi:

— Biz shartlarni va parametrlarni o‘zimiz belgilaymiz. Shundan keyin muzokaralar qog‘ozga tushishi kerak. Biz aniq aytdik: klubga hech qanday futbolchi o‘z qoidalarini o‘tkaza olmaydi.

Uilyams va Yamal – do‘stlar
Uilyamsning «Barselona»ga o‘tishi haqidagi ovozalarga uning jamoaning yosh yulduzi Lamin Yamal bilan yaqin do‘stligi ham sabab bo‘lgan.

Ikki vinger ham Yevro-2024da Ispaniya terma jamoasi safida yaxshi o‘yin ko‘rsatgan: Uilyams ikki gol urgan va bir golli uzatma qilgan.

Hozirda Niko Uilyams jarohatdan tiklanmoqda. Joriy mavsumda u La Ligada uchta o‘yin o‘tkazib, bir gol va bir golli uzatma qayd etdi.