"Наполи" бош мураббийи Антонио Конте ярим ҳимоячи Кевин де Брюйне билан муносабатлари ҳақида гапирди.

Бельгиялик футболчи А Сериянинг сўнгги турида "Милан"га қарши ўйинда захирага олинганидан норозилигини билдирди, кейинроқ мураббий бу ҳақда кескин фикр билдирди. Матбуотда 34 ёшли футболчининг мутахассис билан жанжаллашиб қолгани ҳақидаги миш-мишлар тарқалгани ажабланарли эмас.

"Де Брюйне бизга бошқа янги келганлар билан солиштирганда бошқача воқеликдан келган. У кўп йиллар давомида "Манчестер Сити"да энг юқори савияда ўйнаган. Айтадиган гапим йўқ, у яхши йигит ва астойдил ишлайди. Унинг ўйнашни хоҳлаётганини тушунаман, лекин бошқа футболчилар ҳам бор. Мен ғалаба қозонишни истайман ва кимнидир алмаштирсам, фақат жамоа манфаати учун," - дея Контенинг сўзларини келтиради Corriere dello Sport.

Чоршанба куни "Наполи" Чемпионлар лигасида "Спортинг" устидан ғалаба қозонди (2:1). Де Брюйне Расмус Хёйлундга иккита голли узатмани амалга оширди.