Саудия Арабистонининг «Ал-Ҳилол» клуби «Бавария» ҳужумчиси Харри Кейнгa йилига 100 миллион евро маош таклиф қилгани ҳақида Германиянинг нуфузли нашри Bild хабар берди.

Манба маълумотига кўра, саудияликлар «Бавария» ва Англия терма жамоаси форварди билан умумий қиймати 300 миллион евро бўлган уч йиллик шартнома тузишга тайёр.

32 ёшли Кейн 2023 йилда ҳам Яқин Шарқ клубларидан келган таклифларни рад этган эди, аммо инглиз ҳужумчиси бу сафарги таклифни келаси ёзда кўриб чиқиши мумкин.

Кейн 2023 йил ёзида «Тоттенҳэм»дан «Бавария»га ўтган. Шу вақт ичида у барча мусобақаларда 106 та ўйинда майдонга тушиб, 103 та гол урган ва 29 та голли узатма амалга оширган.

Футболчининг амалдаги шартномаси 2027 йил ёзигача мюнхенликлар билан амал қилади. "Transfermarkt" портали маълумотларига кўра, Кейнинг бозор қиймати 75 миллион еврони ташкил этади.