Ёзда "Барселона" "Манчестер Юнайтед"дан ҳужумчи Маркус Рэшфордни ижарага олди. Клублар ўртасидаги келишувда футболчини 30 миллион еврога сотиб олиш банди кўрсатилган.
Испаниянинг Sport нашри "Барселона" Рэшфордни келаси мавсумда ҳам сақлаб қолмоқчи экани ҳақида ёзмоқда. Аммо шу билан бирга, каталонияликлар сотиб олиш опциясини фаоллаштириш ва 30 миллион тўлаш ниятида эмас.
"Барселона"да клуб Рэшфорднинг арзонроқ трансфер нархи ёки иккинчи ижараси борасида келиша олишига ишонч бор. "Кўк-анорранглилар" "Манчестер Юнайтед"нинг музокаралардаги позицияси у қадар кучли бўлмайди, деб ҳисобламоқда.
Якшанба куни Маркус Рэшфорд "Севилья" дарвозасини ишғол қилди, аммо "Барселона" 1:4 ҳисобида мағлуб бўлди.
