УЕФА раҳбари Александр Чеферин миллий лигаларнинг хориждаги ўйинлари ҳақида фикр билдирди.
Бугун Европа футбол ассоциациялари иттифоқи истисно тариқасида Ла Лига ва А Серия ўйинларини Испания ва Италиядан ташқарида ўтказишга рухсат берди. Шу тариқа, "Вильярреал" ва "Барселона" АҚШнинг Майами шаҳрида, "Милан" ва "Комо" эса Австралиянинг Перт шаҳрида ўйин ўтказиши мумкин бўлади.
"Лига ўйинлари ўз ватанида ўтказилиши шарт. Бошқа ҳар қандай қарор ўйинларга келадиган содиқ мухлисларни овоз бериш ҳуқуқидан маҳрум этади ва мусобақанинг адолатли кечишига путур етказиши мумкин. Биз ўтказган маслаҳатлашувлар бу хавотирлар нақадар жиддий эканлигини тасдиқлади.
Гарчи бу ўйинларни [чет элда] ўтказишга рухсат беришга мажбур бўлганимиз ачинарли бўлса-да, бу қарор фақат истисно тариқасида қабул қилинган ва уни прецедент сифатида кўрмаслик лозим.
Бизнинг мақсадимиз аниқ: миллий лигаларнинг яхлитлигини ҳимоя қилиш ва футболнинг ўз табиий муҳитида қолишини таъминлаш," - деди Чеферин.
