«Гранада» дарвозабони Люка Зидан Жазоир терма жамоасига чақирилгани ҳақида фикр билдирди.
Мадриднинг “Реал” клуби собиқ футболчиси ва мураббийи Зайниддин Зиданнинг ўғли бўлган Люка Африка терма жамоаси сафида халқаро майдонда дебют қилиш имконига эга бўлади. У 9 ва 14 октябрь кунлари жамоа билан Сомали ҳамда Угандага қарши ўйинларда қатнашиши мумкин.
«Бу ерда, Жазоирда бўлганимдан жуда хурсандман. Бу менинг терма жамоага илк чақирувим — ва бу мен учун фахр. Жаҳон чемпионати саралашининг навбатдаги ўйинида ғалаба қозонишни истаймиз, бу жуда муҳим беллашув. Умид қиламанки, мухлислар бизга ёрдам беришади», — деди Зидан RMC Sport нашрига.
Жазоир терма жамоаси 2026 йилги Жаҳон чемпионати (АҚШ, Канада ва Мексика) саралашида 8 та ўйиндан сўнг 19 очко жамғариб, G гуруҳида пешқадамлик қилмоқда.
Жорий мавсумда Люка Зидан Испания чемпионати иккинчи дивизионида тўп сурмоқда. У 7 та учрашувда майдонга тушиб, 13 та гол ўтказиб юборган.













