"Реал" ва "Тоттенхэм" клубларининг собиқ ҳимоячиси Серхио Регилон АҚШнинг "Интер Майами" клубига ўтишга келишиб олди. Бу ҳақда журналист Бен Жейкобс маълум қилди.
Манбага кўра, 28 ёшли испаниялик футболчи "Интер Майами" билан шартномага оғзаки розилик берган. У тез орада 2028 йилгача мўлжалланган шартномага имзо чекиши ва Лионель Месси тўп тепаётган жамоага бориб қўшилиши кутилмоқда.
2020 йилдан 2025 йилгача Регилон "Тоттенхэм"га тегишли бўлган, аммо кўп вақтини ижарада ўтказган. Бу вақт ичида ҳимоячи "шпорлар" сафида 73 та ўйин ўтказиб, иккита гол урди ва тўққизта голли узатма муаллифига айланди. Ўтган ёзда футболчи клубни эркин агент сифатида тарк этганди.
