Лондоннинг «Челси» клуби «Ювентус» форварди Кенан Йилдизнинг трансферини қўлга киритиш учун янги таклиф тайёрламоқда, деб хабар бермоқда La Gazzetta dello Sport.

Манба маълумотларига кўра, лондонликлар 20 ёшли турк ҳужумчиси бўйича музокараларни қайтадан бошламоқчи. Шу билан бирга, футболчига «Барселона» ҳам қизиқиш билдирган. Европанинг йирик клублари қизиқиши ортиб бораётганини инобатга олган ҳолда, «бьянконери» Йилдизни Туринда сақлаб қолишни истамоқда. Клуб ҳозирда янги шартнома борасида ўйинчининг отаси — унинг агенти билан музокара олиб бормоқда.

Жорий мавсумда туркиялик ҳужумчи «Ювентус» сафида барча мусобақаларда 12 та ўйинда майдонга тушди, 5 та гол урди ва 6 та голли узатма амалга оширди.

Кенан Йилдизнинг Турин клуби билан амалдаги шартномаси 2029 йил ёзигача мўлжалланган. Transfermarkt маълумотларига кўра, унинг бозор қиймати 75 миллион еврога тенг.