Англия Премьер-лигасида сентябрь ойи якунларига кўра энг яхши мураббий танланди. Мукофотни "Кристал Пэлас" бош мураббийи Оливер Гласнер қўлга киритди.
Соврин учун курашда Гласнер Хосеп Гвардиола, Микель Артета ва Рожер ле Бри каби мутахассисларни ортда қолдирди.
Сентябрь ойида бўлиб ўтган Премьер-лиганинг учта ўйинида "Кристал Пэлас" етти очко тўплади. Оливер Гласнер жамоаси "Сандерленд" билан дуранг ўйнади (0:0), кейин "Вест Хэм" (2:1) ва "Ливерпуль"ни (2:1) мағлуб этди.
Айни пайтда "Кристал Пэлас" Англия чемпионати турнир жадвалида олтинчи ўринда бормоқда. Етти турда "бургутлар" 12 очко тўплашга муваффақ бўлишди.
