Грузия терма жамоаси бош мураббийи Вилли Саньол Испанияга (0:2) қарши ўйиндан кейин Педрининг ўйинидан олган таассуротлари билан ўртоқлашди.
Испанлар ўз майдонида Йереми Пино ва Микель Оярсабалнинг голлари эвазига устун келди. Педри 74-дақиқагача ўйнади, шундан сўнг у Пабло Барриосга алмаштирилди.
"Педри шундай енгил кўринадики, уни шамол учириб кетиши мумкиндек, аммо бу унинг дунёдаги энг яхши ярим ҳимоячилардан бири бўлишига тўсқинлик қилмайди. У жуда ақлли, ҳар доим жамоа манфаатларини биринчи ўринга қўяди," - дея Саньолнинг сўзларини келтиради The Touchline.
"Барселона"нинг 22 ёшли хавбеки Испания терма жамоаси сафида 37 та ўйинда майдонга тушиб, 5 тадан гол ва ассист муаллифи бўлди.
