«Милан»нинг собиқ ҳужумчиси ва ҳозирда клуб эгаларининг маслаҳатчиси сифатида фаолият юритаётган Златан Ибраҳимович 40 ёшли Лука Модричнинг жамоага қўшаётган ҳиссаси ҳақида фикр билдирди.

«Лука — бу шунчаки футболчи эмас. У — футболнинг ўзи. У футбол ўйнамайди, у футболни ифодалайди. Биз турличамиз: у майдонда етакчи, лекин майдон ташқарисида тинчроқ. Аммо айнан унинг тажрибаси “Милан”да етишмаётган бўғин эди. Ҳатто унинг статистикаси ажойиб бўлмаса ҳам, жамоага таъсири улкан.

У йигирма йилдан бери энг юқори даражада ўйнаб келмоқда. Баъзилар икки мавсум ёрқин ўйин кўрсатса, кейин йўқолиб қолади, бошқалар эса ўн йиллаб чўққида қолади — улар чемпионга айланади, ҳатто “Олтин тўп”сиз ҳам. Модрич ана шундайлардан бири, ва у бугун биз билан», — деди Ибраҳимович журналист Жанлука Ди Марцио сайтига берган интервьюсида.

Эслатиб ўтамиз, хорватиялик ярим ҳимоячи Лука Модрич жорий ёзда эркин агент сифатида «Милан» сафини тўлдирган эди. 40 ёшли футболчи жорий мавсумдаги Серия Aнинг 6 та ўйинида 1 та гол ва 1 та голли узатма қайд этган.