Мениск жароҳати туфайли номаълум муддатга сафдан чиққан "Ювентус" марказий ҳимоячиси Глейсон Бремер тиззасидан операция қилинди. Бу ҳақда Турин жамоаси матбуот хизмати хабар берди.
"Глейсон Бремерга чап тизза медиал менискининг артроскопик селектив менискектомияси амалга оширилди. Процедура муваффақиятли ўтди. Яқин кунларда футболчи реабилитацияга киришади," - дейилади клуб расмий баёнотида.
Жорий мавсумда бразилиялик футболчи барча мусобақаларда бешта ўйинда майдонга тушиб, иккита голли узатмани амалга оширди.
"Ювентус" А Серия турнир жадвалида 12 очко билан бешинчи ўринда бормоқда.
