Ўзбекистон миллий терма жамоаси бош мураббийи Фабио Каннаваронинг ёрдамчи мураббийлари ҳақида маълумот.

Эуженио Альбарелла — жисмоний тайёргарлик бўйича мураббий. 1965 йилда Италиянинг Неапол шаҳрида туғилган. 2010 йилда "Ювентус" клубида фаолият олиб борган. Бир йил ўтиб, Альберто Заккеронининг мураббийлар штабига қўшилган ва Япония миллий терма жамоаси билан биргаликда 2011-йилги Осиё кубогида ғолибликни қўлга киритган.

Альбарелла 2016 йилда Хитойнинг "Беижинг Гоан" клубида ишлаган. Ўша пайтда клуб сафида ўзбекистонлик собиқ футболчи Егор Кримец ҳам тўп тепган.

2023–2024 йилларда у Фабио Каннаваронинг мураббийлар штаби таркибида Италиянинг "Удинезе" клубида фаолият юритган, шунингдек, кейинчалик Хорватиянинг "Динамо Загреб" жамоасида ҳам ишлаган.

Антонио Кименти — дарвозабонлар мураббийи. 1970 йил 30 июнь куни Италиянинг Бари шаҳрида туғилган. Собиқ профессионал дарвозабон бўлиб, "Самбенедеттесе", "Монца", "Салернитана", "Рома", "Лечче", "Кальяри", "Удинезе" ва "Ювентус" клубларида ўйнаган. "Ювентус" сафида у Жианлуижи Буффондан кейинги иккинчи дарвозабон сифатида танилган.

Мураббийлик фаолиятини "Ювентус" ёшлар жамоасида бошлаган. Кейинчалик "СПАЛ", "Сампдория" ва Италия U-21 терма жамоасида дарвозабонлар мураббийи сифатида фаолият олиб борган.

Франческо Троисе — ёрдамчи мураббий. У 1972 йил 5 февраль куни Италиянинг Неаполь шаҳрида туғилган.

УЕФАнинг А тоифадаги мураббийлик лицензиясига эга. Футболчилик фаолиятини 1990–1994 йилларда "Наполи" ёшлар жамоаси, шунингдек, "Каселе" ва "Потенца" клубларида ўтказган.

2013 йилдан мураббийлик фаолиятини бошлаган. Фаолиятини "Кьево" ва "Уотфорд" клубларида Жузеппе Саннинонинг ёрдамчиси сифатида бошлаган.

Кейинчалик, "Катания", "Ан-Наср", "Гуанжоу Эвергранд", "Беневенто", "Удинезе", "Динамо Загреб" каби жамоаларда ишлаган. 2016 йилдан бери Фабио Каннаваро билан бир штабда ишлаб келмоқда.