Мадриднинг "Реал" клуби ҳужумчиси Килиан Мбаппе ҳамон жароҳатини даволай олмаяпти.
26 ёшли футболчи Франция терма жамоаси сафида Озарбайжонга қарши кечган сўнгги ўйинда жароҳат олган. Дастлаб, ҳужумчи "Реал"нинг "Хетафе" билан яқинлашиб келаётган ўйинига қадар тўлиқ тикланишга улгуриши тахмин қилинган эди, аммо футболчининг аҳволи ҳали ҳам яхши эмас. L’Equipe хабарига кўра, Мбаппе ҳамон тўпиғида оғриқ ҳис қилмоқда, шу боис унинг Ла Лигада бўлажак жангда иштирок этиши сўроқ остида қолмоқда.
"Реал" юлдуз французнинг тайёргарлигини жума ва шанба кунги жамоавий машғулотларда баҳолайди, Мбаппени таркибга қўшиш бўйича якуний қарор эса якшанба куни, ўйиндан олдин қабул қилинади.
