Испаниянинг "Барселона" клуби Uber транспорт компанияси билан ҳомийлик шартномасини эълон қилишга тайёрланмоқда. Бу ҳақда Mundo Deportivo нашри хабар бермоқда.
Тегишли тадбир 22 октябрь куни бўлиб ўтади. Унда Uber билан аллақачон ҳамкорлик қилаётган ҳимоячи Пау Кубарси, шунингдек, клуб бош директори Манель дель Рио ва Uber Iberia бош директори Фелипе Фернандес Арамбуру иштирок этади.
Битимнинг молиявий томони ҳозирча номаълум. Айни пайтда "Барселона" аллақачон Midea компанияси (мавсум учун 12 миллион евро), Конго Демократик Республикаси (2029 йилгача форма рекламаси учун 40 миллион) билан ҳомийлик шартномалари, шунингдек, Spotify билан 2030 йилгача 380 миллион евро атрофида даромад келтирадиган шартномага эга.
