Туркия Суперлигасининг 9-туридан ўрин олган “Башакшеҳир” ҳамда “Галатасарой” жамоалари ўртасидаги баҳс 18 октябрь, шанба куни Истанбулдаги “Фотиҳ Терим” стадионида бўлиб ўтди. Учрашувда меҳмонлар 2:1 ҳисобида зафар қучди.

Учрашув эҳтиёткор руҳда бошланди. Илк дақиқаларда жамоалар ҳужумлар билан алмашиб туришди, бироқ ташаббусни аста-секин «Галатасарой» қўлга олди. 21-дақиқада Габриэль Сара жуда хавфли зарба берди, дарвозабон Муҳаммед Шенгезер муваффақиятли ҳаракат қилди. Бироқ танаффус арафасида Илкай Гюндоган аниқ узатма берди, Лерой Сане яқин масофадан устун бурчакка йўллаган зарбаси билан ҳисобни очди — 0:1.

Иккинчи бўлим бошида мезбонлар фаоллашди. 48-дақиқада Элдор Шомуродов рикошетдан кейин биринчи бўлиб тўпга етди ва дарвоза чизиғид олдидан тўпни тўрга жойлади. VAR орқали ҳолат текширилди ва офсайд туфайли гол бекор қилинди.

Шунга қарамай, 59-дақиқада ўзбекистонлик ҳужумчи барибир ҳисобдаги тенглаштиришга муваффақ бўлди. Ўнг қанотдан Оливье Кемен томонидан йўлланган узатмани Шомуродов дарвозага йўллаб, “Галатасарой” посбонини доғда қолдирди.

62-дақиқада Лерой Сане яна саҳнага чиқди — жарима майдонида тўпни қабул қилиб, чап бурчакка аниқ зарба йўллади ва дублни расмийлаштирди — 1:2. Бу зарба беллашув тақдирини ҳал қилди.

Қолган вақтда «Башакшеҳир» босимни оширди, аммо «Галатасарой» ҳимояси ишончли ҳаракат қилди. Виктор Осимхен ва Бариш Йилмаз ҳисобни ошириш имконига эга бўлишди, аммо иккала зарба ҳам тўсинга тегди.

«Галатасарой» муҳим сафар ғалабасини қўлга киритиб, чемпионлик учун курашни давом эттирмоқда. «Башакшеҳир» эса характер кўрсатди, аммо ҳал қилувчи дақиқаларда хатоларга йўл қўйди.

Туркия — Суперлига.
“Истанбул Башакшехир” – «Галатасарой» – 1:2
Голлар: 0:1 – Сане (45'), 1:1 – Шомуродов (48'), 1:2 – Сане (62').

Ўзбекистонлик футболчи Элдор Шомуродов ўйинни асосий таркибда бошлаб, 90 дақиқа ҳаракат қилган бўлса, Аббосбек Файзуллаев жароҳат сабаб қайдномага киритилмади.