"Ювентус" бош мураббийи Игор Тудор А Серия 7-туридан ўрин олган "Комо"га қарши ўйинни сарҳисоб қилди. Учрашув "кекса синьора"нинг 0:2 ҳисобидаги мағлубияти билан якунланди.
"Биз босим ўтказишни хоҳладик, баъзида буни яхши уддаладик. Биз қўл қовуштириб ўтирмадик. Қийин ўйин бўлди, биринчи бўлимда тенгма-тенг ўйнадик, аммо стандартдан ўтказиб юбордик. Иккинчи бўлимда рақибнинг қўполликлари ҳаракатларимизга путур етказди, иккинчи голдан сўнг ўйин якунланди. Биз икки ҳужумчи ва икки вингер билан ўйнай олмаймиз, унда ким ҳимояланади?" - дея мутахассиснинг сўзларини келтиради Жанлука Ди Марцио сайти.
"Мени нимадир безовта қиляптими? Ҳар доим. Менинг ҳаётим шундай. Ғалаба қозонаманми, дуранг ўйнайманми ёки ютқазаманми - мен яхшироқ қилиш мумкин бўлган нарсалар ҳақида ўйлашим керак. Кийиниш хонасида маслаҳатлашамиз".
Бу ўйиндан кейин "Комо" бешинчи, "Ювентус" олтинчи ўринда бормоқда. Ҳар икки жамоа ҳисобида 12 тадан очко мавжуд. Клубларнинг жадвалдаги ўрни турнинг бошқа ўйинлари якунланганидан кейин ҳам ўзгариши мумкин.
