"Хетафе" Мадриднинг "Реал" клуби вингери Винисиус Жуниорнинг хатти-ҳаракатларидан норози бўлди. Якшанба куни бўлиб ўтган Ла Лига учрашуви "қаймоқранглилар"нинг кичик ҳисобдаги ғалабаси билан якунланди. Ягона гол муаллифи Килиан Мбаппе бўлди - у 80-дақиқада дарвозани ишғол қилди.
Гол урилишига уч дақиқа қолганида "Хетафе" ўн киши бўлиб қолди - Винисиус Жунирни тўп йўқ жойда тўхтатган Аллан Ньом майдондан четлатилди. Мураббий Хосе Бордаласнинг фикрича, бразилиялик футболчи ҳакамни тўғридан-тўғри қизил карточка кўрсатишга мажбур қилиш учун симуляция қилган. Мезбонлар футболчилари ҳам худди шундай фикрда эди.
Эпизодлардан бирида Винисиус ҳимоячи Хуан Иглесиас билан тўқнашиб кетди. Испаниялик рақибига ўзининг фикрини айтди: "Шунинг учун ҳам сени бутун дунё ёмон кўради. Жамоадошларингдан ўрган," - дея 27 ёшли футболчининг сўзларини келтиради Madrid Universal.
Кейинги турда "Реал" "Барселона" билан, "Хетафе" Бильбаонинг "Атлетик" клуби билан ўйнайди.
