"Xetafe" Madridning "Real" klubi vingeri Vinisius Juniorning xatti-harakatlaridan norozi bo‘ldi. Yakshanba kuni bo‘lib o‘tgan La Liga uchrashuvi "qaymoqranglilar"ning kichik hisobdagi g‘alabasi bilan yakunlandi. Yagona gol muallifi Kilian Mbappe bo‘ldi - u 80-daqiqada darvozani ishg‘ol qildi.

Gol urilishiga uch daqiqa qolganida "Xetafe" o‘n kishi bo‘lib qoldi - Vinisius Junirni to‘p yo‘q joyda to‘xtatgan Allan Nyom maydondan chetlatildi. Murabbiy Xose Bordalasning fikricha, braziliyalik futbolchi hakamni to‘g‘ridan-to‘g‘ri qizil kartochka ko‘rsatishga majbur qilish uchun simulyasiya qilgan. Mezbonlar futbolchilari ham xuddi shunday fikrda edi.

Epizodlardan birida Vinisius himoyachi Xuan Iglesias bilan to‘qnashib ketdi. Ispaniyalik raqibiga o‘zining fikrini aytdi: "Shuning uchun ham seni butun dunyo yomon ko‘radi. Jamoadoshlaringdan o‘rgan," - deya 27 yoshli futbolchining so‘zlarini keltiradi Madrid Universal.

Keyingi turda "Real" "Barselona" bilan, "Xetafe" Bilbaoning "Atletik" klubi bilan o‘ynaydi.