Англиялик тажрибали мураббий Шон Дайч "Ноттингем Форест" билан икки йиллик шартнома имзолайди. Бу ҳақда инсайдер Фабрицио Романо ўзининг шахсий ижтимоий тармоғида маълум қилди.
Романонинг тушунтиришича, клуб томони ва мураббий томон ҳамкорлик ҳақида оғзаки келишиб олган, энди фақат ҳужжатларни имзолаш қолди.
Эслатиб ўтамиз, "Ноттингем Форест" АПЛ янги мавсумида муваффақиятсизликка учрамоқда. Клуб ҳозирча 5 очко билан турнир жадвалида атиги 18-ўринни эгаллаб турибди. Дам олиш кунлари "ўрмончилар" австралиялик мураббий Анге Постекоглуни истеъфога чиқарди, у клубда мавсум бошидан бери ишдан бўшатилган иккинчи мураббийга айланди. Аввалроқ бундай қисмат Нуну Эшпириту Санту бошига тушган эди.
Эслатиб ўтамиз, "Ўрмончилар" бу мавсум параллел равишда Европа Лигасида ўйнамоқда. Пайшанба куни жамоани бу мавсумда барча жабҳаларда ниҳоятда кучли бўлган жуда қийин рақиб - "Порту" билан ўйин кутмоқда.
