Франция терма жамоаси ва «ПСЖ» ҳужумчиси Усмон Дембеле Adidas компаниясидан махсус F50 бутсаларини қабул қилди. Улар кўк ва олтин рангларда ишланган бўлиб, футболчига 2025 йилги дунёнинг энг яхши ўйинчиси сифатида «Олтин тўп» совринини қўлга киритгани муносабати билан тақдим этилган.
Ўтган мавсумда француз вингери барча мусобақаларда 53 та ўйинда майдонга тушиб, 35 та гол урди ва 16 та голли узатма берди. Дембеле «ПСЖ» таркибида Чемпионлар лигаси, Франция чемпионати, мамлакат Кубоги ва Суперкубогида ғалаба қозонди.
Футболчининг амалдаги шартномаси клуб билан 2028 йил ёзигача мўлжалланган. Transfermarkt портали маълумотларига кўра, Дембеленинг бозор қиймати 100 миллион еврони ташкил қилади.
