Испания терма жамоасининг собиқ футболчиси Тьяго Алькантара «Барселона» бош мураббийи сифатида ўз дебютини яқинлашиб келаётган “Эл-класико”да — «Реал»га қарши учрашувда ўтказиши мумкин.

Эслатиб ўтамиз, Ла Лиганинг 9-туридан ўрин олган драматик «Барселона» — «Жирона» (2:1) учрашувида каталонияликлар бош мураббийи Ханс-Дитер Флик қўшимча дақиқаларда майдондан четлатилган эди.

Шу сабабли, Флик мавсумнинг асосий баҳси ҳисобланган «Реал»га қарши “эл-класико”да захира ўриндиғида бўлолмайди. Ушбу ўйин 26 октябрь, якшанба куни «Сантьяго Бернабеу» стадионида бўлиб ўтади.

Forblaugrana нашри маълумотига кўра, бош мураббий йўқлигида жамоани бошқариш вазифаси Тьяго Алькантарага топширилади. Шу тариқа, “Барса”нинг собиқ яримҳимоячиси учун бу учрашув мураббий сифатидаги илк расмий синов бўлиши мумкин.

Алькантара «Барселона» академияси тарбияланувчиси бўлиб, 2011–2013 йилларда асосий жамоа сафида ўйнаган, кейин эса «Бавария»га йўл олган.

2024 йил ёзида Флик "кўк-анорранглилар"ни бошқаришни бошлаганда, Тьяго унинг мураббийлар штабига қўшилган эди. Кейинроқ у мураббийлик лицензиясини олиш учун вақтинча жамоани тарк этганди. Энди эса у яна «Барса»га қайтди ва қийин вазиятда жамоага ёрдам бериши, ҳатто «Реал»га қарши афсонавий дербини бошқариши мумкин.