"Бавария" ўз майдонида "Брюгге"ни мағлуб этиб (4:0), ғалабали сериясини давом эттирди.
Венсан Компани жамоаси жорий мавсумдаги 12 та расмий ўйиннинг барчасида ғалаба қозонди - бу немис футболининг барча даврлардаги рекорди, дея таъкидлайди Opta. Европанинг бешта етакчи лигасидаги энг узоқ давом этган серияни такрорлаш учун фақат битта ғалаба керак. Ҳозирча рекордчи Италиянинг "Милан" клуби бўлиб турибди, у 1992/93 йилги мавсумни 13 та ғалаба билан бошлаган.
Мюнхенликлар 25 октябрь, шанба куни Бундеслига доирасида "Боруссия М" меҳмони бўлса, кейинги чоршанба куни Германия кубоги доирасида "Кёльн"га қарши майдонга тушади.
