Суперлига 26-туридан ўрин олган «Қизилқум» — «Динамо» (2:0) учрашувидан сўнг «Қизилқум» бош мураббийи Акмал Рустамов матбуот анжуманида иштирок этди.

— Ўйинга келадиган бўлсак, чиройли ўйин кўрдик деб ўйлайман. «Пахтакор»дан учраган мағлубиятдан кейин уйда «Динамо»ни ютмасак бўлмасди. Бугун яхши ҳаракат қилгани учун шогирдларимга, бизни қўллаб-қувватлагани учун мухлисларга раҳмат айтмоқчиман. Энди кейинги ўйинга тайёргарликни бошлаймиз. Бугун яхши ўйин гувоҳи бўлдингиз. 2:0 ҳисоби билан ғалаба қозондик, бу албатта ёқимли.

— «Динамо» жамоасида терма даражасидаги футболчилари бор. «Қизилқум»да ҳам шундай футболчилар борми? Раҳбарият клуб олдига термага футболчи етказиш вазифасини қўйганми?

— Рақиб таркибида ёшлар кўп. Уларнинг айримлари термаларда ўйнашади. «Динамо» кучли жамоа. Бизда термага футболчилар етказиб бериш учун вақт керак бўлади. Таркибимизда яхши савиядаги ёшлар бор. Уларга имконият беришга ҳаракат қиламиз. Аввало жамоамиз таркибида ўйнашса, худо хоҳласа, термаларда ҳам ўйнашади. Бу борада ҳам ҳаракат қиламиз.