Мадриднинг "Реал" клуби бош мураббийи Хаби Алонсо "Барселона"га қарши ўйинда Эдуардо Камавингани асосий таркибда тушириш қарорига изоҳ берди.
Франциялик хавбек ҳар доим ҳам "қаймоқранглилар" сафида асосий таркибда майдонга тушавермайди, аммо якшанба кунги "класико"да у ўйиннинг бошидан охиригача ўйнади. Учрашув мадридликларнинг 2:1 ҳисобидаги ғалабаси билан якунланди.
"Эдуардо - жуда динамик ва универсал футболчи, худди Беллингем ва Гюлер каби. Бундай ўйинда ярим ҳимояда сусткашликка йўл қўя олмасдик. Майдон маркази "Барселона"нинг юқори прессингини енгиб ўтишда ва тўпни марказ ҳамда қанотлар орқали олдинга олиб чиқишда жуда муҳим роль ўйнади," - деди Алонсо матбуот анжуманида.
