Мадриднинг «Реал» клуби ҳимоячиси Давид Алаба яқин вақтларда жамоасини алмаштириши мумкин. Бу ҳақда журналист Себастьен Видаль хабар берди.
Маълумотларга кўра, 33 ёшли австриялик футболчига АҚШнинг «Нью-Йорк Сити» клуби қизиқиш билдирган. МЛС вакиллари тажрибали ҳимоячини қишки трансфер ойнасида ўз сафига қўшиб олиш имкониятини кўриб чиқмоқда.
Алабанинг амалдаги шартномаси «Реал» билан 2026 йил ёзигача мўлжалланган. Ҳозирча томонлар ўртасида шартномани узайтириш бўйича музокаралар олиб борилмаётгани айтилмоқда.
Жорий мавсумда марказий ҳимоячи Хаби Алонсо жамоаси сафида 4 та ўйинда иштирок этди. Сўнгги икки баҳсда эса жароҳати сабаб қатнашмади.













