“Сурхон” – “Андижон” (4:0) баҳсидан сўнг бўлиб ўтган Суперлиганинг 26-тур учрашувидан кейин термизликлар устози Февзи Давлетов матбуот анжуманида иштирок этди.

Ўйин ҳақида:

– Кетма-кет 3 та мағлубиятдан сўнг футболчиларнинг руҳиятини кўтариш асосий масала эди. Йигитлар уддалашди. Биринчи бўлимда жуда яхши ҳаракат қилдик. Ўйинни соддалаштириб, тўпни рақибга топширдик ва прессинг орқали ўйнашга уриндик. “Андижон”нинг аввалги баҳслардаги муаммоларини ўрганиб чиқдик. Бу серия қачондир тугаши керак эди. Йигитлар барчасини тўғри бажаришди.

“Андижон” Чемпионлар лигасининг 3 та ўйинида 3 та дуранг ўйнади. Уларнинг кейинги босқичга чиқиш имкониятини қандай баҳолайсиз?

– Имконият ҳар доим бўлади. Учта ўйин – дуранг. “Андижон” гол уришда муаммоларга дуч келяпти. Ҳали имконият бор, курашиш керак.

Бугун Беҳруз Каримов гол уришга муваффақ бўлди, Камрон Юсупов яхши таассурот қолдирмоқда. Ёш бўлишига қарамасдан, улар қўрқмасдан ўйнамоқдалар. Умуман, жамоангиздаги ёш футболчилар ҳақида қандай фикрдасиз?

– Ёшларни майдонга тушириш учун ҳисоб яхши эди, бундан ташқари рақиб қизил карточка олди. Ёшлар мавсумолди баҳсларида кучли жамоаларга қарши ўйнашган, қачондир уларни майдонга тушириш керак-ку. 4-голдан сўнг футбол ўйнашдан тўхтаб қолдик, шу нарса бироз ёқмади. Ўша темпда давом этиш керак эди. Йигитларда потенциал бор, асосийси — ишлашдан тўхтамаслик лозим.