"Ан-Наср" ҳужумчиси Криштиану Роналду Саудия Арабистони кубоги доирасида "Ал-Иттиҳод"га қарши ўйиндаги (1:2) муваффақиятсизликка изоҳ берди.
Жорже Жезуш жамоаси мусобақанинг 1/8 финалида принципиал рақибга имкониятни бой бериб қўйди. 40 ёшли Роналду учрашув бошидан охиригача ўйнади, бироқ самарали ҳаракатлари билан кўзга ташланмади.
"Биз матонатни сақлаб қоламиз, ўрганамиз ва биргаликда олдинга интиламиз", - деб ёзди португалиялик мағлубиятдан сўнг ижтимоий тармоқда.
Эслатиб ўтамиз, Криштиану Роналду ҳозирча Саудия Арабистонида соврин ютгани йўқ. Жорий йилнинг ёзида форвард клуб билан 2027 йилнинг ярмигача мўлжалланган янги шартнома имзолади.
