"Ювентус" клуби матбуот хизмати италиялик мутахассис Лучано Спаллетти жамоа бош мураббийи этиб тайинлангани ҳақида маълумот тарқатди. Мураббий билан тузилган шартнома 2026 йил 30 июнигача мўлжалланган.
"Биз билим ва тажриба жиҳатидан бундай даражадаги мураббийни "бьянконери" оиласига қабул қилишдан мамнунмиз. Хуш келибсиз, "Ювентус"га, ва омад тилаймиз, мураббий!" — дейилади туринликлар сайтидаги расмий баёнотда.
А Сериянинг тўққизта туридан кейин "Ювентус" 15 очко жамғарган ва еттинчи ўринда бормоқда.
Спаллеттининг охирги иш жойи Италия терма жамоаси бўлган — у бу жамоани 2023 йил сентябридан 2025 йил июнигача бошқарган. Ундан олдин мураббий "Наполи", "Интер", "Рома" ва "Зенит" клубларида фаолият юритган. Унинг фаолиятида "Наполи" билан бир марта, "Зенит" билан эса икки марта чемпионлик мавжуд.













