«Ювентус»нинг янги бош мураббийи Лучано Спаллетти ва Турин клуби ўртасидаги шартномада келишувни автоматик узайтириш имконияти кўзда тутилмаган. Sky Sport Italia хабарига кўра, мутахассис билан тузилган саккиз ойлик келишув мавсум якунланганда автоматик равишда узайтирилмайди.

Аввалроқ, мураббий ва клуб ўртасидаги битимда агар «Ювентус» келаси мавсум учун УЕФА Чемпионлар лигасига йўлланма олса, шартнома мажбурий равишда узайтирилиши мумкинлиги ҳақида хабарлар тарқалган эди. Аммо манба маълумотига кўра, узайтириш банди мажбурий эмас ва қарор клуб раҳбариятининг хоҳишига боғлиқ бўлади.

Спаллетти 2023 йил сентябридан 2025 йил июнига қадар Италия терма жамоасига бош мураббийлик қилган. Шунингдек, унинг клуб даражасидаги сўнгги жамоаси «Наполи» бўлган.