«Ливерпуль» бош мураббийи Арне Слот Англия Премьер-лигасидаги чемпионлик учун кураш ҳақида фикр билдирди.

Шанба куни мерсисайдликлар ўз майдонида «Астон Вилла»ни 2:0 ҳисобида мағлуб этиб, мағлубиятлар сериясига чек қўйишди. «Қизиллар» жадвалда еттинчи ўриндан учинчи поғонага кўтарилишди, аммо етакчи «Арсенал» билан фарқ ўзгармади — етти очко. Худди шу куни «канонирлар» ҳам «Бёрнли»ни 2:0 ҳисобида ютишган эди.

«Чемпионлик учун курашми? Ҳозир бу ҳақда ўйламайман, аммо эҳтимол, биз учун етакчи ўринда “Арсенал”нинг бўлиши “Манчестер Сити”га нисбатан фойдали», — деди Слот TNT Sportsга берган интервьюсида.

Хосеп Гвардиола бошқараётган жамоа ўз ўйинини бугун ўтказади — рақиб «Борнмут», у жадвалда иккинчи ўринни эгаллаб турибди. «Шаҳарликлар» ҳозирча саккизинчи поғонада, «Арсенал»дан тўққиз очкога ортда, аммо бир ўйин захираси бор.