Италия чемпионати — А Сериянинг ўнинчи туридан ўрин олган учрашувлардан бирида Туриннинг «Ювентус» жамоаси «Кремонезе» меҳмони бўлиб, янги бош мураббий Лучано Спаллетти қўл остидаги илк ғалабасини қўлга киритди. Ҳисоб жуда тез очилди — учрашув бошланганига 85 сония тўлмасдан сербиялик ҳужумчи Филип Костич мезбонлар дарвозасини ишғол этди.
Маълум бўлишича, бу туринликлар учун А Сериядаги сафар ўйинларида тарихдаги иккинчи энг тез урилган гол ҳисобланади. Фақат бир марта, 2008 йил 20 апрель куни, «Ювентус» сафарда бундан ҳам тез гол урган — ўшанда Никола Легротталье «Аталанта»га қарши баҳсда 46-сонияда дарвозани ишғол этган эди.
