Бугун Доҳа шаҳрида 2025-йилги ФИФА U-17 Жаҳон чемпионати старт олади.
Ўзбекистон U-17 терма жамоаси ўсмирлар ўртасидаги Жаҳон чемпионатларида 4-бор иштирок этмоқда. Жамоамиз 2011 (Мексика) ва 2023 йилги (Индонезия) мусобақада чорак финалга қадар етиб борган. 2013 йил Бирлашган Араб Амирликларида ўтган мундиалда эса 1/8 финал босқичида иштирокини якунлаган.
Исломбек Исмоилов бошқарувидаги жамоамиз 2025 йилги ФИФА U-17 Жаҳон чемпионатининг "J" гуруҳида Парагвай, Ирландия ва Панама ўсмирлар терма жамоаларига қарши баҳс олиб боради.
Парагвай
Йўлланма: U-17 Жанубий Америка чемпионати — 5-ўрин
Мундиалдаги иштирок: 5
Энг яхши натижа: Чорак финал (1999, 2019)
Мураббий: Мариано Углессич
Эътиборга лойиқ ўйинчи: Алан Ледесма
Ледесма U-17 Жаҳон чемпионати йўлланмасини қўлга киритишда Парагвай жамоасининг муҳим ўйинчиси бўлди. Жамоа сардори сифатида у майдон марказида ўйинни бошқаради ва курашувчанлиги билан ажралиб туради. У, шунингдек, U-17 Жанубий Америка чемпионатида Парагвай иккита пенальти сериясида ғалаба қозонган ва уларда ўз зарбасини аниқ амалга ошириб, жамоасининг ғалабасига ҳисса қўшди.
Панама
Йўлланма: КОНКАКАФ U-17 саралаш босқичи — гуруҳ ғолиби
Мундиалдаги иштирок: 3
Энг яхши натижа: 1/8 финал (2011)
Мураббий: Леонардо Пипино
Эътиборга лойиқ ўйинчи: Эстевис Лопес
Чап қанот ҳужумчиси — Лопес мураббий Леонардо Пипинонинг тизимида муҳим ўрин тутади. У КОНКАКАФ U-17 саралаш босқичида Панаманинг учта голида қатнашган, ижодкорлиги ҳамда аниқ ва кучли зарбаси билан ўйинни ўз фойдасига ўзгартира олади. Ҳозирда у Панаманинг "Costa del Este" клубидан "Ривер Плейт" ёшлар жамоасига ижарада ўйнамоқда.
Ирландия
Йўлланма: УЕФА U-17 Европа чемпионати финал босқичи қатнашчиси
Мундиалдаги иштироклар: 0
Энг яхши натижа: Йўқ
Мураббий: Колин ЎБрайн
Эътиборга лойиқ ўйинчи: Жейден Умеҳ
Тезкор, ижодкор ва гол уришга моил ҳужумчи Умеҳ Португалиянинг "Бенфика" клуби сафида тўп тепади. У 2024 йилда Португалияга кўчиб ўтган ва Ирландия бош мураббийи Колин О'Брайннинг айтишича, у "Бенфика" академиясига қўшилгач, ўйини сезиларли даражада яхшиланган. Умеҳнинг акаси Франко ҳам профессионал футболчи бўлиб, ҳозир Ирландия U-21 терма жамоасида ўйнайди.
Эслатиб ўтамиз, 17 ёшгача футболчилар ўртасидаги ФИФА Жаҳон чемпионати жорий йилнинг 3–27 ноябрь кунлари Қатар яшил майдонларида бўлиб ўтади. Ўзбекистон U-17 терма жамоаси турнир доирасидаги илк учрашувни 5 ноябрь куни Парагвайга қарши ўтказади.
