Тошкент дербиси ҳар доим қизиқарли ва муросасиз кечади. Бу сафар ҳам «Пахтакор» ва «Бунёдкор» ўртасидаги баҳс юқори темпда бошланди. Амалдаги Ўзбекистон Кубоги соҳиби ҳисобланган «шерлар» ўйинни ҳужумкор руҳда бошлади ва аввалги дақиқаларданоқ ташаббусни қўлга олди.

6-дақиқада Башар Ресаннинг аъло даражадаги узатмасидан кейин Достон Ҳамдамов ҳисобни очди — 1:0. Бу гол дербининг кайфиятини белгилаб берди. Орадан олти дақиқа ўтиб, Ҳожиакбар Алижонов ўзининг юксак маҳоратни намоён этган зарбаси билан ҳисобни 2:0 га етказди.

«Пахтакор»нинг илк ярим соатдаги ўйини ўта ишончли кўринишда бўлди — Абдурауф Бўриев ҳимояда аъло ҳаракат қилди, Ресан ва Собирхўжаев эса марказни тўлиқ назорат қилди. Биринчи бўлим якунланишидан олдин Иброҳим Иброҳимов узоқ масофадан йўллаган кучли зарба билан ҳисобни 3:0 кўринишига олиб келди.

Бироқ иккинчи бўлим бошлангач, «Бунёдкор» жавоб зарбасини берди. 52-дақиқада Кривокапич Назаровнинг хатосидан фойдаланиб тўпни дарвозага йўллади, 57-дақиқада эса Темурхўжа Абдухолиқовнинг голи интригани тиклади — 3:2.

Шундан кейин «Пахтакор»да Турғунбоев, Эркинов ва Фламарино каби захирадагилар майдонга тушиб, ўйинга янгича нафас киритди. Қор аралаш ёмғир остида кечган баҳс жуда курашларга бой бўлди.

Ва ниҳоят, ўйиннинг сўнгги дақиқаларида Ҳожимат Эркинов 90+5-да гол уриб, дербининг нуқтасини қўйди. Шавкат Насибуллаевнинг ҳуштаги билан «Пахтакор» мухлислари яна бир муҳим ғалабани нишонлади.

«Пахтакор» дербидаги ғалаба эвазига ўз очколарини 55  тага етказиб олди. «Бунёдкор» эса 46 очко билан 5-ўринда қолди.

Суперлига. 27-тур
«Пахтакор» — «Бунёдкор» 4:2
Голлар: Ҳамдамов, 6; Алижонов, 12; Иброҳимов, 45; Эркинов, 90+5 — Кривокапич, 52; Абдухолиқов, 57
Бош ҳакам: Шавкат Насибуллаев