Саудия Арабистонида бошланган VI Ислом бирдамлик ўйинларининг футзал мусобақаси доирасида бугун дастлабки баҳслар ўтказилди. "А" гуруҳида иштирок этаётган Ўзбекистон футзал терма жамоаси Саудия Арабистонига қарши майдонга чиқди.

Биринчи бўлим тенгкурашлар остида кечди. Голлар эса таймнинг сўнгги дақиқасида урилди. Абдулла Али Алмачраби дабл-пенальтидан ҳисобни очди — 1:0. Бироқ жамоамиз тезда жавоб қайтарди: шу дақиқадаёқ Музаффар Ахаджонов гол уриб, ҳисобни тенглаштирди — 1:1.

Иккинчи бўлимда ўзбекистонлик футзалчилар устунликни тўлиқ ўз қўлига олди. 27-дақиқада Муҳаммадали Ҳусанбоев жамоамизни олдинга олиб чиқди — 1:2. Орадан беш дақиқа ўтиб Акбар Усмонов ҳисобни 1:3 қилиб оширди. 34-дақиқада Машраб Одиловнинг голи устунликни янада мустаҳкамлади — 1:4.

Учрашув сўнгида Саудия терма жамоаси бешинчи ўйинчи тактикаси остида ҳаракат қила бошлади. Бунинг натижасида Солиҳ Мари Алқарний битта жавоб тўпини киритган бўлса, дарвозабонимиз Аббос Элмуродов бешинчи голимизга муаллифлик қилди — 2:5!

Бу натижа билан Ўзбекистон терма жамоаси “A” гуруҳида илк турни ишончли ғалаба билан якунлади.

VI Ислом бирдамлик ўйинлари. “A” гуруҳи, 1-тур
Саудия Арабистони – Ўзбекистон – 2:5
Голлар:
1:0 — Абдулла Али Алмачраби (20')
1:1 — Музаффар Ахаджонов (20’)
1:2 — Муҳаммадали Ҳусанбоев (27')
1:3 — Акбар Усмонов (32')
1:4 — Машраб Одилов (34')
2:4 — Солиҳ Мари Алқарни (38')
2:5 — Аббос Элмуродов (39')
Огоҳлантириш: Хайрулло Солихов (5')