Ўзбекистон Суперлигаси 28-туридан ўрин олган “Қўқон-1912” — “Пахтакор” ҳамда “Бунёдкор” — “Динамо” учрашувлари якунланди.

Фарғонадаги “Марказий” стадионида бўлиб ўтган “Қўқон-1912” — “Пахтакор” баҳсида ғолиб аниқланмади. Учрашув давомида ҳар икки жамоа бир неча бор хавфли ҳужумлар уюштирган бўлса-да, дарвозалар дахлсиз қолди — 0:0.

Мазкур дурангдан сўнг “Пахтакор” очколарини 56 тага етказиб, турнир жадвалида 3-ўринни эгаллаб турибди. “Қўқон-1912” эса 30 очко билан 10-поғонада бормоқда.

Тошкентдаги “Олимпия” стадионида кечган “Бунёдкор” — “Динамо” учрашувида эса меҳмонлар 3:1 ҳисобида ғалаба қозонди.

Ҳисоб 43-дақиқада “Бунёдкор” ҳужумчиси Имеда Ашортия томонидан очилди. Бироқ орадан атиги бир дақиқа ўтиб, Жаҳонгир Абдусаломов ҳисобни тенглаштирди — 1:1.

Иккинчи бўлимда “Динамо” устунликни ўз қўлига олди. 72-дақиқада Дмитрий Плетнев Самарқанд клубини ҳисобда олдинга олиб чиқди, 88-дақиқада эса Фирдавс Абдураҳмонов учинчи голни киритиб, якуний ҳисобни ўрнатди — 3:1.

Мазкур ғалабадан сўнг “Динамо” очколарини 53 тага етказиб, 4-ўринга кўтарилди. “Бунёдкор” эса 46 очко билан 5-поғонада қолмоқда.

Ўзбекистон Суперлигаси, 28-тур

“Қўқон-1912” — “Пахтакор” 0:0

“Бунёдкор” — “Динамо” 1:3
Голлар: 1:0 — Имеда (43), 1:1 — Абдусаломов (44), 1:2 — Плетнев (72), 1:3 — Абдураҳмонов (88)